ថ្ងៃពុធ៣រោច ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៨ ខែកក្កដា ឆ្នាំ ២០២០ លោក ឡាយ វិសិដ្ឋ ប្រធានមន្ទីរ និងក្រុមការងារខណ្ឌរដ្ឋបាលជលផល បានចុះពិនិត្យ ស្ថានភាពទូទៅនៃការចិញ្ចឹមត្រីជាលក្ខណៈគ្រួសារ របស់ កសិករឈ្មោះ សុភាព នៅក្នុងភូមិដប់បាត សង្កាត់លលកស ក្រុងពោធិ៍សាត់ ខេត្តពោធិ៍សាត់។ កសិករបានបញ្ជាក់ទៀតថា សកម្មភាពចាប់ផ្តើមប្រកបរបរចិញ្ចឹមត្រីអណ្តែងជាលើកដំបូង អនុវត្តលើទំហំស្រះ៣,៥មx៦ម ជម្រៅ ២,៥ម និងដាក់កូនពូជចំនួន ២៥គ.ក្រ ស្មើនឹង ៥.៧៥០កូន ក្នុងតម្លៃ ២៣.០០០រៀល/គ.ក្រ ។ចំពោះ កូនត្រីដែលគាត់បានដាក់ចិញ្ចឹម គាត់បានទិញពូជពីអ្នកភ្ញាស់កូនលក់ចែកចាយនៅស្រុកក្រគរ។ ការចិញ្ចឹមត្រីអណ្តែងនេះចាប់ដាក់កូនពីថ្ងៃទី១ ខែមិថុនា ឆ្នាំ ២០២០ ហើយមកទល់ពេលនេះ ត្រីអណ្តែងអាចប្រមូលផលបាន និងលក់បណ្តើៗហើយ ដោយលក់តម្លៃដុំ ៦.០០០រៀល/គ.ក្រ និងលក់រាយក្នុងតម្លៃ ៧.០០០រៀល/គ.ក្រហើយភាគច្រើនអតិថិជនដែលអ្នកមកទិញ គឺជាអ្នកខេត្តពោធិ៍សាត់ផ្ទាល់តែម្តង។ ចំណីដែលគាត់ប្រើ ឲ្យត្រីស៊ីប្រចាំថ្ងៃជាប្រភេទចំណីស្រាប់ ដែលមានតម្លៃ ៧.៨០០រៀល/គ.ក្រ (ប្រូតេអ៊ីន៣០%) សម្រាប់កូនត្រីនៅពេលដាក់ដំបូង ប្រភេទទំហំ ៦លី និង ១០លី សម្រាប់ត្រីធំ។ជាចុងក្រោយ គាត់បានបញ្ជាក់ថាមុខរបរចិញ្ចឹមត្រីអណ្តែងនេះ ជាមុខរបរមួយបន្ថែមទៀតសម្រាប់បង្កើនប្រាក់ចំណូលក្នុងគ្រួសាររបស់គាត់ ក៏ដូចជាលើកស្ទួយជីវភាពប្រចាំថ្ងៃ ហើយក៏ជាប្រភេទត្រីដែលងាយស្រួលក្នុងការចិញ្ចឹមផង ឆាប់លូតលាស់ និង មានតំលៃទីផ្សា។