ថ្ងៃព្រហស្បតិ៍ ៩កើត ខែមាឃ ឆ្នាំឆ្លូវ ត្រីស័ក ព.ស ២៥៦៥  ត្រូវនឹងថ្ងៃទី១០ ខែកុម្ភៈ ឆ្នាំ២០២២ លោក ឡាយ វិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ រួមជាមួយ លោក ហៃ ធូរ៉ា អនុប្រធានមន្ទីរ លោក ភុំ វិមល នាយខណ្ឌរដ្ឋបាលជលផល បានចូលរួមកិច្ចប្រជុំជាមួយក្រុមការងារមជ្ឈមណ្ឌលបណ្តុះបណ្តាលសហគមន៍ព្រៃឈើសម្រាប់តំបន់អាស៊ី ប៉ាស៊ីហ្វិក (RECOFT) ប្រទេសកម្ពុជា ដែលដឹកនាំដោយ លោក ហេង ដា អនុប្រធាន (RECOFT) ដើម្បីសំណេះ​សំណាល​ពីការអនុវត្តរបស់អង្គការ រីខូហ្វ និងដំណើរការគម្រោងបឹងទន្លេសាបរបស់យើងដែលមានអ្នកចូលរួមសរុបចំនួន ១០នាក់ កិច្ចប្រជុំធ្វើនៅសាលប្រជុំមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ ។ គោលបំណងនៃកិច្ចប្រជុំនេះ ៖

១.បង្ហាញពីទស្សនៈទានសំខាន់នៃគម្រោង RECOFT  និងការគាំទ្រសម្រាប់គម្រោងបឹងទន្លេសាប និងសហគមន៍ព្រៃឈើ និងស្វែងរកការគាំទ្រពីមន្ទីរ

២.ពិភាក្សាលើតំបន់គោលដៅគម្រោងចំនួន ០៤សហគមន៍ (ជលផល ចំនួន២ និង សហគមន៍ព្រៃឈើចំនួន២) និងបង្កើនកិច្ចសហការរវាងមន្ទីរ និងអង្គការដៃគូ ក្នុងការស្តារព្រៃលិចទឹក សាកល្បងព្រៃលិចទឹក និងរៀបចំផែនការ ។