ថ្ងៃសុក្រ ១៣រោច ខែចេត្រ ឆ្នាំខាល ចត្វាស័ក ព.ស ២៥៦៥ ត្រូវនឹង ថ្ងៃទី២៩ ខែមេសា ឆ្នាំ២០២២ ក្រុមការងារថ្នាក់ជាតិ បង្ក្រាបបទល្មើសជលផលប្រចាំការ នៅបឹងទន្លេសាបមានទីតាំងនៅកន្លែងអភិរក្សជលផលជ្រោយស្ដី ដឹកនាំដោយ ឧត្តមសេនីយ៍ទោ ម៉ែនស៊ីប៊ន នាយសេនាធិការរងកងរាជអាវុធហត្ថលើផ្ទៃប្រទេស និងអនុសេនីយ៍ឯក យិន សុពុទ្ធាយុទ្ធ តំណាងអគ្គស្នងការនគរបាលជាតិកម្លាំងអធិការដ្ឋានរដ្ឋបាលជលផលខាងត្បូងបឹងទន្លេសាប ដោយមានការចូលរួម នាយ នាយរងសង្កាត់ជលផលកណ្ដៀង យោធាខេត្ត និងប៉ូលីសស្រុកកណ្ដៀង ដែលមានកម្លាំងសរុបចំនួន ១៦នាក់ និងកាណូតចំនួន ៣គ្រឿង បានចុះប្រតិបត្តិការត្រួតពិនិត្យទប់ស្កាត់ និងបង្រ្កាបបទល្មើសជលផល ប្រទះឃើញជនសង្ស័យកំពុងលួចធ្វើនេសាទនៅកន្លែងទឹករាក់ ជាលក្ខណ:គ្រួសារក្នុងកន្លែងអភិរក្សជលផលឡូតិ៍លេខ ០៦ ភូមិ កោះក្អែក ឃុំរាំងទិលស្រុកកណ្ដៀង ខេត្តពោធិ៍សាត់ ជាលទ្ធផលបានដកហូត វត្ថុតាងរួមមាន÷
- មងរាយប្រវែង ៧៥០ ម៉ែត្រ
- សន្ទួចរនងចំនួន ១.៥០០ ផ្លែ
- ត្រីចំរុះទម្ងន់ ៥៤ គីឡូក្រាម (ខូចគុណភាព)
រីឯមនុស្ស ក្រុមការងារបានឯកភាពគ្នា អប់រំ ណែនាំ និងធ្វើកិច្ចសន្យាបញ្ឈប់ការនេសាទខុសច្បាប់ ។
ចំពោះវត្ថុតាងទាំងអស់ដែលបានដកហូត ត្រូវយកមករក្សាទុក ដើម្បីបំផ្លាញចោលតាមនីតិវិធី ។
រក្សាសិទិ្ធគ្រប់យ៉ាងដោយ ក្រសួងកសិកម្ម រុក្ខាប្រមាញ់ និងនេសាទ
រៀបចំដោយ មជ្ឈមណ្ឌលព័ត៌មាន និងឯកសារកសិកម្ម