ថ្ងៃសុក្រ ៥រោច ខែពិសាខ ឆ្នាំខាល ចត្វាស័ក ព.ស ២៥៦៦ ត្រូវនឹង ថ្ងៃទី២០ ខែឧសភា ឆ្នាំ២០២២ លោក ផាត់ សារុន ប្រធានការិយាល័យផលិតកម្ម និងបសុព្យាបាល បានបញ្ជាឱ្យមន្រ្តីជំនាញចាប់រឺម៉កដឹកក្របីងាប់០១ក្បាលតាមផ្លូវជាតិលេខ០៥ត្រង់ចំណុចស្ថានីយ៍ប្រេងឥន្ធន: ភូមិអណ្តូងក្រសាំង ឃុំស្នាមព្រះ ស្រុកបាកាន ទិសដៅពីលិច ទៅកើត របស់ឈ្មោះ ផាន់ ធឿន ភេទ ប្រុស អាយុ ៤៦ឆ្នាំ ទីលំនៅបច្វុប្បន្នភូមិ ឈើទាលខ្ពស់ ស្រុកក្រគរ ។ ក្របីងាប់នេះនាំចេញពីឃុំរំលេច ស្រុកបាកាន ដើម្បីយកទៅវះកាត់លក់សាច់នៅស្រុកក្រគរ ។ ឈ្មោះ ផាន់ ធឿន នេះជាឈ្មួញទិញ លក់គោ ក្របី និងមានប្រពន្ធទីពីរជាអាជីវករមានអាជីវកម្មពិឃាតសត្វគោក្របី នៅភូមិថ្គោលធំ ឃុំ អន្សាចំបក់ ស្រុកក្រគរ។ ដោយមានការអនុញ្ញាតពីលោកប្រធានមន្ទីរ បានដកហូតក្របីងាប់០១ក្បាល (មានក្លិនស្អុយ) ដេីម្បីអនុវត្តវិធានបសុពេទ្យ (ចាក់ស្រោចថ្នាំសម្លាប់មេរោគ និងជីកកប់ដី) នៅស្ថានីយ៍កសិកម្មស្រង់ ដោយមិនមានការផាកពិន័យនោះឡើយ គឺគ្រាន់តែបានធ្វើកំណត់បទល្មើសជាក់ស្តែង ណែនាំ និងធ្វើកិច្ចសន្យាបញ្ឈប់ការយកសត្វឈឺឬងាប់ដឹកជញ្ជូនឬវះកាត់យកសាច់បរិភោគឬលក់ដូរបន្តទៀតឡើយ រួចឱ្យសាម៉ីខ្លួនធានាកប់សាកសពក្របីនេះត្រឹមត្រូវតាមបច្ចេកទេសនៃវិធានបសុពេទ្យ ។
រក្សាសិទិ្ធគ្រប់យ៉ាងដោយ ក្រសួងកសិកម្ម រុក្ខាប្រមាញ់ និងនេសាទ
រៀបចំដោយ មជ្ឈមណ្ឌលព័ត៌មាន និងឯកសារកសិកម្ម