ថ្ងៃអង្គារ ១៥កើត ខែជេស្ឋ ឆ្នាំខាល ចត្វាស័ក ព.ស ២៥៦៦ ត្រូវនឹង ថ្ងៃទី១៤ ខែមិថុនា ឆ្នាំ២០២២ លោក ឡាយ វិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ និងលោក មាស សេត ប្រធានការិយាល័យក្សេត្រសាស្រ្ត និងផលិតភាពកសិកម្ម បានចុះពិនិត្យស្ថានភាពបង្កបង្កើនផលស្រូវរដូវវស្សា នៅឃុំខ្នារទទឹង ស្រុកបាកាន និងឃុំតាលោ ស្រុកតាលោសែនជ័យ ដឹកនាំដោយ ឯកឧត្តម តូច ប៊ុនហួរ រដ្ឋលេខាធិកា ក្រសួងកសិកម្ម រុក្ខាប្រមាញ់ និងនេសាទ រួមដំណើរមាន លោក គង់ គា ប្រធាននាយកដ្ឋានដំណាំស្រូវ ។
ជាលទ្ធផល បានជួបសួរនាំកសិករ ក្នុងភូមិដំណាក់ធ្នង់ អំពីការធ្វើស្រែកន្លងមក និងពេលបច្ចុប្បន្ន បន្ទាប់មកទៀត បានជួបកសិករ ភូមិកោះស្វាយ ឃុំតាលោ ស្រុកតាលោសែនជ័យ និងបានចូលជួបពិភាក្សាជាមួយក្រុមប្រឹក្សាឃុំតាលោសែនជ័យ ក្នុងនោះឯកឧត្តមបាន សួរនាំអំពីការអនុវត្តការងារបង្កបង្កើនផល ឆ្នាំនេះ ពីការយឺតយ៉ាវជាងឆ្នាំមុន ជាចម្លេីយរបស់ក្រុមប្រឹក្សាឃុំដោយសារ ភ្លៀងច្រើនចាប់ពីខែមីនា មក ធ្វើអោយតំបន់មួយចំនួន ទឹកដក់ក្នុងស្រែច្រើន ដែលមិនអាចធ្វើកើត មួយទៀតជី ថ្នាំកសិកម្ម ប្រេងមានតម្លៃខ្ពស់ ចំណែក តំបន់ខ្លះទៀត មិនមានប្រភពទឹក ពួកគាត់ចាប់ធ្វើក្នុងខែកក្កដា ខាងមុខ ជាបន្តបន្ទាប់ ។ ឯកឧត្តមក៏បានផ្តល់អនុសាស្រ្តមួយចំនួន ដល់ក្រុមប្រឹក្សាឃុំ គួរចុះពិភាក្សាផ្ទាល់ជាមួយកសិករ ពីបញ្ហារាំស្ទះ សហការណ៍ជាមួយមន្ទីរធនធានទឹក ដើម្បីជួយ កាយរំដោះទឹក និងគួរធ្វើស្រែបណ្តាក់គ្នា ដើម្បីងាយស្រួលក្នុងការបញ្ចេញទឹក កាត់បន្ថយការប្រើជីគីមី ថ្នាំដែលមានតម្លៃខ្ពស់ ត្រូវតែធ្វើអោយបានគ្រប់គ្នា ធ្វើបានត្រូវទុកបរិភោគខ្លះ ជៀសវាងការខ្វះខាតស្បៀង សម្រាប់ខ្លួនឯង និងពិនិត្យជាក់ស្តែងនូវកសិករណាដែលបានធ្វើរួចតែបានខូចទៅវិញ ហើយគ្មានពូជធ្វើបន្ត ត្រូវធ្វើសំណើទៅអាជ្ញាធម៌ស្រុក ខេត្ត អោយបានលឿន កុំអោយផុតពេលរដូវវស្សា ។
