ថ្ងៃអង្គារ ៣កើត ខែមាឃ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី២៤ ខែមករា ឆ្នាំ២០២៣​ លោក​ ហៃ​ ធូរ៉ា​ ប្រធាន​មន្ទីរ​កសិកម្ម​ រុក្ខាប្រមាញ់​ និង​នេសាទ​ ខេត្តពោធិ៍សាត់​ បានអញ្ជេីញ​ចូលរួម​ប្រជុំស្តីពីការប្រើប្រាស់ដីធ្លី ក្នុងតំបន់ការពារធម្មជាតិភូមិសាស្ត្រ នៃខេត្តពោធិ៍សាត់​ ក្រោមអធិបតីភាព​ ឯកឧត្តម សុខ គាង រដ្ឋលេខាធិការក្រសួងបរិស្ថាន និងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់

កិច្ចប្រជុំនេះ ត្រូវបានធ្វើឡើង នៅសាលប្រជុំជាន់ទី១សាលាខេត្ត ដោយមានការចូលរួមពីថ្នាក់ដឹកនាំមន្ទីរអង្គភាពជំនាញជុំវិញខេត្ត និងអាជ្ញាធរមូលដ្ឋានពាក់ព័ន្ធមួយចំនួនទៀត។

គោលបំណងសំខាន់នៃកិច្ចប្រជុំ គឺដើម្បីរួមគ្នាពង្រឹងសមត្ថកិច្ចគ្រប់គ្រង និងប្រើប្រាស់ដីរដ្ឋ ក្នុងតំបន់ការពារធម្មជាតិ លើកកម្ពស់ប្រសិទ្ធភាពការងារ គ្រប់គ្រងសំណល់រឹង សំណល់រាវទីប្រជុំជនក្រុង លើកកម្ពស់ជីវភាពសហគមន៍តំបន់ការពារធម្មជាតិ និងពង្រឹងការយល់ដឹងជាសាធារណៈ អំពីកិច្ចគាំពារបរិស្ថាន ការអភិរក្សជីវៈចម្រុះ និងការរស់នៅដោយចីរភាព សំដៅធានាឱ្យបាននូវភាពសុខដុមសង្គម សុវត្ថិភាព និងតុល្យភាព នៃប្រព័ន្ធអេកូឡូស៊ី និងការអភិវឌ្ឍប្រកបដោយចីរភាព។